ЧАШНИКСКАЯ РЦБС

Мова - наша спадчына, якую мы атрымліваем ад бацькоў і павінны перадаць наступным пакаленням. Менавіта таму наша агульная задача - берагчы, захоўваць і развіваць родную мову, пашыраць сферы яе прымянення, знаходзіць новыя формы для павышэння агульнага ўзроўню моўнай пісьменнасці і культуры.
У Міжнародны дзень роднай мовы для дзяцей малодшага і сярэдняга школьнага ўзросту супрацоўнікі Дварэцкай сельскай бібліятэкі-клуба правялі турнір дапытлівых “Любі, ведай, шануй роднае слова”. Госці мерапрыемства перакладалi рускiя словы i сказы на беларускую мову, называлi малюнкi беларускiмi назвамi, адгадвалi загадкi. Дзеці з задавальненнем чыталi вершы беларускiх пiсьменнiкаў: М.Пазнякова “Беларусь”, “Скарына”, “Я нарадзіўся тут і рос”; В.Віткі “Сонейку”, “Вясна”, “Сяброўкі”; Н.Гілевіча “Сябры ў паходзе” і інш. Мерапрыемства дало дзецям магчымасць акунуцца ў чароўны свет роднай мовы, узбагаціць свае веды пра культуру Беларусі, пра родную мову і літаратуру.
Да Міжнароднага дня роднай мовы ў бібліятэцы-клубе аформлена кніжная выстава “Родная мова - духоўная спадчына народа”.